Монгол орон цаг уурын эрс тэс уур амьсгалтайгаас шалтгаалан гольфийн улирал 04 сараас 10 сарын хооронд үргэлжилдэг. Энэ хугацаанд 3 гольфийн талбай дээр 7 хоног бүр тэмцээн зохиогдож явдаг бөгөөд жилдээ нийт 30+ тооны тэмцээн уралдаан зохиогдож байна. Улирлын нээлт ихэвчлэн 4-р сард “Балдорж кап” тэмцээнээр  эхэлж, 10-р сард клуб хоорондын тэмцээн зохиогдсоноор дуусдаг уламжлалтай.  Тэмцээн бүрд ойролцоогоор 60-100 тоглогч оролцон өрсөлддөг. Тухайн жилийн тэмцээний хуваарийг вебсайтын “тэмцээн – тэмцээний хуваарь” хэсгээс харах боломжтой.

Гольфийн тэмцээн үргэлжлэх хугацааны хувьд нэг удаагийн эсвэл цуврал тэмцээн байдлаар зохиогддог. Гольфийн спортын онооны онцлог нь хандикепийн системийг ашиглаж шинэ сонирхогч, туршлагатай тоглогч эн тэнцүү өрсөлдөх боломжийг олгох боломжтой байдаг. Ихэнхи тэмцээн stroke play форматаар явагддаг бөгөөд gross оноогоор үнэмлэхүй аварга, хандикепийн ангиллын аварга, longest driver, nearest to pin үзүүлэлтээр шагналт байр шалгаруулна. Үүнээс гадна match play, stableford, team match төрлийн тэмцээнүүд зохиогддог.

USGA болон R&A байгууллагаас нэвтрүүлсэн хандикепийн системийг Монголын Гольфийн Холбоо ашигладаг бөгөөд холбооны гишүүн болсноор өөрийн хандикепийг тогтоолгох боломжтой болно. Хандикепийн системд бүртгэгдсэнээр тэмцээн, уралдааны хандикеп ангилалд байр эзлэх, stableford зэрэг хандикепт суурилсан тэмцээнүүдэд өрсөлдөх боломжтой. Хандикепийн систем нь дэлхий даяар мөрдөгддөг систем учраас R&A гишүүн бүх улс оронд таны хандикеп хүлээн зөвшөөрөгдөнө.

Тэмцээний товыг та вебсайтын тэмцээний хуваарь хэсгээс харах боломжтой бөгөөд бүртгэл нээгдэх, хаагдах зар Монголын Гольфийн Холбооны вебсайт, facebook page хуудсан дээр тухай бүр орно. Спонсор байгууллагуудын тэмцээн тодорхой оролцогчийн тооны хязгаар заадаг учраас холбооны гишүүд, бусад сонирхогчид гэсэн дарааллаар бүртгэл явагддаг.